Sambandho Nu Management (Gujarati Edition)

માબાપ સહિત સહુ કોઈને તમે લાખોમાં એક હો તો બહુ ગમે. પણ ખરેખર તમે જ્યારે લાખોમાં એક બનવાનો પ્રયત્ન શરૂ કરો છો ત્યારે તેઓ કહે : `આવું તે કંઈ થતું હશે?' આનો ગર્ભિત અર્થ એવો થયો કે બાકીના 99,999 લોકો જેવું જ તમારે વિચારવું, અનુભવવું અને કરવું.



જીવનમાંથી કોઈક સંબંધની બાદબાકી થઈ જશે કે કોઈક સંબંધ નહીં ઉમેરાય તો જીવન અધૂરું રહી જશે એવી અસલામતીથી પીડાતા લોકો એ સંબંધ સિવાયના એમના જીવનના બાકીના હિસ્સામાંથી મળતા આનંદને માણવાનું ગુમાવી બેસે છે.



તમારા નિર્ણયોનું પરિણામ તમારા પોતાના માટે કે બીજાઓ માટે ખોટું આવી શકે. પણ નિર્ણય પોતે સ્વતંત્રપણે ખોટો નથી હોતો. એ લેવાયો હોય ત્યારે લેનારની દાનત પોતાના પૂરતી તો શુભ જ હોવાની.



કેટલાક દુશ્મનો પોતાની દુશ્મનીનું કૃત્ય ઉઘાડું ન પડી જાય એ માટે તમારું નુકસાન કરી લીધા પછી માફી માગી લે છે. પણ નુકસાન તો થઈ જ ગયું હોય છે.



પ્રશંસા મેળવવાની જેમને ટેવ પડી ગઈ છે તેઓ ટીકાથી ગભરાતા હોય છે.



તમને ખબર હોય છે કે સાચા મિત્રો મૈત્રીના આ સંબંધને આવરી લેતા પ્રદેશમાં જે કંઈ કરે છે તેની પાછળનો આશય એકદમ શુભ છે, અને જે કંઈ નથી કરતા તેની પાછળનાં કારણો તદ્દન દોષરહિત છે.



આસપાસની દુનિયામાં બધા જ ખરાબ છે અને મારા કરતાં ઉતરતા છે, મારા વિચારો સાથે બંધ બેસે એવું આ દુનિયામાં કોઈ નથી એમ વિચાર્યા કરવાથી માણસનું પોતાનું અસ્તિત્વ એક તબક્કે ખાબોચિયા જેવું બની જવાનું.



કેટલીક વિચિત્ર વાત છે કે આજે અને અત્યારે તમને જે વ્યક્તિ ગમતી હોય તે વ્યક્તિનું વ્યક્તિત્વ એના ભૂતકાળને કારણે ઘડાયું છે એવું સમજવા છતાં એના અતીતની ભૂલો તમને કઠતી હોય છે.



બીજાઓ પાસે માન મેળવ્યા કરવાની ઇચ્છા સંતોષવા જતાં તમે એમને તમારું અપમાન કરવાનો હક્ક આપી દો છો.



કઈ વ્યક્તિ સાથે કેવું બને એનો આધાર માત્ર નસીબ નથી.